Nalunaariaaseq nutaaq pitsaasoq atorneqalissaaq

Tassa eqqartuussivimmi peqataasussatut aggeqqusaasumut, suliassanngortinneqarsimasumut imaluunniit eqqartuussivimmi aalajangiivigineqartussamut eqqartuussivik e-Boksikkut allakkanik nassiussisinnaalissaaq.

Eqqartuussivik assigiinngitsunik nalunaarummik tunniusseriaaseqareerpoq soorlu assersuutigalugu:

• Allakkerivik aqqutigalugu nalunaarneq
• Allakkatigut nalunaarneq
• Oqarasuaatikkut nalunaarneq
• Nalunaarutiginnittartutigoorlugu nalunaarneq
• Politiikkoorlugu nalunaarneq

Oqilisakkamik digitalimik nalunaarneq (ODN) naatsumik oqaatigalugu isumaqarpoq, eqqartuussivik Digital Posti aqqutigalungu innuttaasumut allakkamik nassiussisassasoq aamma allagaq, innuttaasumiit iliuuseqarfigineqaannartorlu, tassa ammarneqarsimatillugu, nuunneqarsimatillugu imaluunniit iginneqarsimatillugu inatsisit naapertorlugit eqqortumik nalunaarutigineqarsimasutut tiguneqarsimasutullu isigineqartalissasoq.

Innuttaasumut ilaatigut ima kinguneqassaaq:

• Nalunaarnermik ilisimatitsissummik eqqartuussivimmiit toqqaannartumik digitalimik allagarsivimmi allakkamik pisalernissaq.
• Allagarsiaq arlaatigut iliuuseqarfigineqarpat nalunaarut inatsisitigut atuuttassasoq.
• Eqqartuussinermut aggersarneqartutut najuutinngitsooraanni, assersuutigalugu suliami takkutinngitsoortutut eqqartuussaasoqarsinnaasoq.

Digitalikkut qisuarianngikkaanni eqqartuussivik nalunaariaatsit allat atorlugit nalunaarniarsarissaaq, assersuutigalugu oqarasuaatikkut nalunaarnikkut imaluunniit Politiikkoorlugu nalunaarnikkut.

Nalunaarummik tunniusseriaaseq nutaaq tamanit takuneqarsinnaangilaq, sukkaneruvoq ajornannginnerullunilu, taamaattorli allakkanik digitaliusunik ataavartumik e-Boksimi Sullissivimmiluunniit nakkutilliinerunermik innuttaasumut akisussaaffeqalersitsivoq.

Digitalimik allagarsivimmi allagaq ammarneqarniariartoq eqqartuussiviup tiguneqarsimasutut nalunaarutigineqarsimasutullu isigisalissavaa aamma iginneqaraluarpalluunniit. Tamatuma kingorna eqqartuussinissamut aggersarneqarsimagaanni najuunnissaq pisussaaffigineqalissaaq.

Pissutissaqavissumik agginngitsoortoqaqqusaanngilaq, sulianillu kinguartitsineq eqqartuussiveqarfimmut persaqqusersuutaallunilu aningaasartuutaasarpoq.

Digitalimik aaqqiissut nutaaq atulerneqariartuaassaaq. Saqitsaannermik suliassani siullermik atorneqalissaaq, kingorna aningaasanik akiliisitsiniarnermi suliani nalunaaruteqarnermi atorneqalissaaq kingullertullu pinerluttulerinermi suliani nalunaaruteqarnermi atorneqalissalluni.

Eqqartuussiviup nalunaarummik tunniusseriaatsit qanganisaanerusut suli atorsinnaavai, assersuutigalugu tigusisussaq digitalimik allakkanik atuisinnaanngippat imaluunniit digitalimik allagarsiani ammarneq ajorpagit.