Inatsisit nutaat pingasut 15/11 2026-mi Kalaallit Nunaanni atuutilissapput

Inatsisiliat inatsisitigut isumannaannerulersitsipput malittarisassanillu ullutsinni ilaqutariittut inooqatigiittullu atukkanut naleqqussarneqarlutik. Inatsisit nutaat pingasut atulerneqarneratigut Danmarkimut aamma tulluarsaasoqarpoq.

Allannguutit pingaarnerit aamma qanigisaasunut aappaasunullu sunniutaasussat ataani atuarneqarsinnaappput.

Kingornussisarnermik inatsimmi aappaasoq illersorneqarnerulerpoq

Kalaalerpassuit katisimallutik imaluunniit sivisuumik aappaariillutik inuunerat Kalaallit Nunaanni Kingornussisarnermik inatsimmi nutaami isiginiarneqarpoq, allannguutit annerit ukuupput:

Aappaasup kingornussassai affanngorlutik annertusineqarput

Aappaasup qimagaasup aapparminit kingornussassai (siusinnerusukkut pingajorarterutaasimasut) tunngaviusumik affanngussapput.

Pinngitsoorani kingornussassat sisamararterutinut annikillisinneqassapput

Kingornussisussat aappaasullu pinngitsoorani kingornussassai affarmiit sisamararterummut annikillissapput. Taamaaliornikkut toqusup kingornussassialiorsinnaanermut pisinnaatitaaffii ataatsimut isigalugu pitsanngorsarneqassapput. Taamatullu kingornussassialiassap pingajorarterutaa (3/4) nammineq aalajangerneqarsinnaalluni, soorlu aapparisamut imaluunniit inooqammut kingornussarsisoqarsinnaalluni. Taakku saniatigut pinngitsoorani kingornussassat annertussusaat inatsisitigut aalajangersakkamik killilerneqarsinnaapput (Meeqqamut ataatsimut 1.580.000 kr. 2026)

Inooqataasut periarfissaginnerulissapput kingornussassialiornissarli pisariaqarpoq

Kingornussisarnermik inatsisip nutaap inooqatigiit imminnut kingornussisinnaanerat pitsaanerusumik periarfissaqalersippaa. Inooqatigiit kingornussassialiornikkut taamaallaat imminnut kingornussisinnaapput. Inooqammut annertusisamik kingornussassiarliornikkut aapparisatulli naligiissinneqangajassinnaallutik.

Toqusut pigisaannik agguaasisarnermik inatsimmi

Toqusut pigisaannik agguaasseriaatsit nutaat

Toqusut pigisaannik agguaasseriaatsit nutaat inatsimmi nutaami eqqunneqartut ataani allassimapput. Toqusut pigisaasa agguaanneqarnissaanut agguaasseriaaseq sorleq pineqartumut tulluarnerunersoq eqqartuussivimmit ilitsersorneqarnikkut aalajangerneqartarpoq.

Toqusut pigisaannik agguaassinermi attaviusup suliassai

Toqusup pigisaanik agguaassinermi inummik attaveqaqatigiinnermik ataqatigiissaarinermillu isumaginnittussamik toqqaasoqakkajuttarpoq. Attaveqaatitut toqqagaq amerlanertigut tassaasarpoq kingornussisussaq, qanigisaq imaluunniit inuk kingornussisussat isumaqatigiillutik toqqagaat. Attaveqaatitut suliaqarneq kajumissutsimik suliaqarfiuvoq akiliisussatullu pisussaaffiliisoqarneq ajorpoq.

Aggersaaneq – akiligassaqarfiit piffissaliussap qaangiutinnginnerani piumasanik nalunaaruteqassapput

Aggersaaneq tassaavoq eqqartuussiviup assersuutigalugu nammineq agguaassinermi Statstidendemi pisortatigoortumik nalunaarutigisartagaa. Toqusup akiligassaqarfiisa toqusimanera pillugu ilisimatinneqarnissaat akiligassaqarfiillu toqusup pigisaanut piumasaqaamminnik nalunaaruteqarnissaannut piffissalernissaat taamaaliornermi siunertarineqarpoq. Pisortatigoortumik saqqummiussinermiit sapaatit akunneri aqqaneq-marluk piffissaliunneqartarput. Akigassaqarfiit piffissaliussap iluani piumasaqaatiminnik nalunaaruteqanngitsut, piumasaqaatimi toqusup pigisaaniit akilerneqarnissaannut pisinnaatitaajunnaartarnerat aallaaviusarpoq. Tamanna kingornussisarnermut inatsisaasimasumut sanilliullugu allannguutaavoq.

Toqusut pigisaannik pisariitsumik agguaassineq aamma pigisanik agguaassinermi suliaqartartumik aqutsisoqarluni periuseqarneq

Toqusup pigisaanik agguaassilluni suliaqarnerit ullumikkutut eqqartuussivimmit suliarineqartassapput. Inatsit nutaaq atorlugu pigisanik agguaassinermi aqutsisoqarluni agguaassinertut suliarineqarsinaalissapput. Malittarisassat qeratanngillat taamaalilluni pigisat annertussusaat pisariussusaallu naapertorlugit ajunnginnerusumik suliarineqarsinnaallutik. Pigisanik agguaassinermi aqutsisoqarluni agguaassinerit Kalaallit Nunaanni Eqqartuussivimmit suliarineqartarput.

Aappariit pigisaannik agguaassisarnermik inatsimmi averusernermi avinnermilu malittarisassat ersarinnerusut

Aappariit pigisaannik agguaassisarnermik inatsit, inatsisit aallaavigalugit suliaqarnermut inatsisaavoq Kalaallit Nunaanni Eqqartuussiviup makku pillugit qanoq sulinissaanut malittarisassiuussisoq:

1. Aappariit katissimasut ataatsimut pigisaasa agguaannissaat, aappariilernermi pigisat nassatat akiitsoqarnermiikkaluarpataluunniit
2. Katinnikut aappariit pigisaat immikkut ittut arlallit ataatsimut atorunnaarsinnerat
3. Katisimanani inooqatip ataatsimut pigisanut arlalillu pigisaasa najugaqatigiinnerup atuukkunnaarnerani atorunnaarnerat
4. Pigisat allat tassunga ilagitillugit soqutigisaqaqatigiittut ingerlatat assigisaallu, akiliisinnaajunnaarneq pillugu malittarisassat malillugit suliarineqanngitsut atorunnaarsinnerat

Averusernissaq avinnissarlu Kalaallit Nunaanni Naalagaaffiup sinniisoqarfianut qinnutigineqartarpoq. Aningaasaqarnikkut naatsorsuininarnermi isumaqatigiinngittoqartillugu Kalaalit Nunaanni Eqqartuussivik aatsaat akuliutsinneqartarpoq.

Toqusup pigisaanik aqutsisoq eqqartuussiveqarfiullu nakkutiginninnera

Pisortatigoortumik pigisanik agguaassinermik suliat Kalaallit Nunaanni Eqqartuussivimmit suliarineqartarput. Imaappoq aallarniutaasumik siunnersuineq aamma illuatungeriit isumaqatigiissinnaanerannut periarfissat misissorneqarnerat Kalaallit Nunaanni Eqqartuussivimmit isumagineqartarput. Illuatungeriit isumaqatigiissinnaanngippata Kalaallit Nunaanni Eqqartuussivik toqusup pigisaanik aqutsisumik toqqaasinnaavoq. Toqusup pigisaanik aqutsisoq isumaqatigiinniarnermut periarfissanik misissuinissamut aamma agguaassinermik suliarinnittussatut toqqarneqartarpoq, suliassanut ilaallutik paasissutissanik katersineq, pigisat nalinginik akiitsunillu nalunaaarsuineq aamma qularnaveeqqutitut sillimmasiussineq. Suliap ingerlanera Kalaalit Nunaanni Eqqartuussivimmit nakkutigineqassaaq.

Killilimmik pisortatigoortumik ikiorneqarneq

Pigisanut nalilinnut akiligassanullu aalajangersimasunut pisortatigoortumik ikiorneqarnissamut piumasaqaammut, aappariit katisimasut killiliisinnaapput. Aappariit akiitsoqarfiusumik immikkut pigisallit aamma pisortatigoortumik agguaassinermik atuisinnaapput. Inooqatigiit katisimanngitsut aamma aappariit katisimasut immikkut pigisallit, aningaasaqarnerat akulerusimasut aamma taamatut ikiorneqarsinnaapput.

Naliliisartut aamma pinngitsaaliilluni periutsit

Illuatungiusoq pigisanik agguaassinermi peqataanngippat naliliisartut toqqarneqarsinnaapput aamma pinngitsaaliilluni periutsit atorneqarsinnaapput.

Inatsisit atuutilernissaasa tungaanut

Inatsisit atuutilerneratigut akisussaaffimmut tunngasumik allanngortoqassappat pisortaqarfinnut sulinikkullu peqataasartunut nalunaaruteqartoqarumaarpoq.

Apeqqutit uunga apeqqutigiineqarsinnaapput rig@domstol.gl.